(၁)
ငါ့ဘ၀ရဲ့
ပထမဦးဆုံးစာကြောင်းများ၊
ပထမဦးဆုံးအမှိုက်များ၊
ပြီးတော့…
ပထမဦးဆုံး ရဲရင့်ခြင်းများ
ဒါတွေနဲ့ပဲ
ဒါတွေကို တံခါးခေါက်
လောကဆီကို ရောက်လာခဲ့ပြီ။
(၂)
တစ်ရာသီကနေ တစ်ရာသီပြောင်း၊
ပြက္ခဒိန်တို့လည်း
တစ်ခုပြီးတစ်ခု ဟောင်းသွားကြ၊
ဘ၀မာတိကာရဲ့ ပထမပိုင်းမှာ
“ပိုက်ဆံက အရေးကြီးတယ်” ဆိုတဲ့ ၀ါကျနဲ့နေထိုင်
အလေ့ကျအလွမ်းတွေကို
ကောင်မလေးတစ်ယောက်ဆီ ထားခဲ့ဖူးတယ်။
ဟိုလမ်းမပေါ်က
ယိုင်ရွဲ့နေတဲ့ခြေလှမ်းများလည်း
လုံခြုံနေဖို့လိုရဲ့။
ကမ္ဘာကြီးရဲ့ တစ်ဖက်ဆီမှာ
အသေးအဖွဲ ကိုယ်စီနဲ့
ငါတို့ကြီးကျယ်ကြမယ်။
ရံဖန်ရံခါ ရုပ်ဝတ္ထုတွေအကြောင်း
ဆွေးနွေးကြမယ်။
အဲဒီနောက်မှာတော့
သူများတွေကြားဖို့မလိုတဲ့အသံနဲ့
ငါ့ရဲ့အချိန်ကာလကို ငါကိုယ်တိုင်မောင်းနှင်မယ်။
နောင်အခါ
ငါသေဖို့ လိုအပ်လာတဲ့အခါ
လူသားတို့ ပျော်ရွှင်ကျေနပ်စွာလက်ခံဖို့
သေမင်းနဲ့ တိုင်ပင်မယ်
အမှန်တရားကို နားချမယ်။
ငါ့အတွက် အဆိပ်ခွက်ကို ပြင်ဆင်ထားကြ
ဒီနေရာမှာ ငါ့ကျောပြင်ပေါ်
ရထားတစ်စင်း ခုတ်မောင်းသွားပါစေ။
No comments:
Post a Comment