ရွှေလရောင်ဘွဲ့ လေးချိုး

မြို့လုလင်သာတဲ့ ကွန်းဆီသို့၊ တို့သခင်စာဖွဲ့လို့ ညွှန်းလိုက်ကဲ့၊ ဒါနဲ့ လွမ်းကြပေတော့ကွာ။

မြို့သူကြီးရယ်လို့၊ တိုထီးနေသမျှပေပေါ့၊ ရွှေလရောင်ဘွဲ့သတင်းရယ်နဲ့၊ ဦးမင်းရောင် ဗိုလ်ဝင်ခံလို့မို့၊ ဟိုအရင် ယမန်စစ်အင်ကျင်းတယ်၊ ခင်းတဲ့ဗျူဟာ။

မြတ်လောကီ သဘာဝတွင်ဖြင့်၊ ဓာတ်ကောလီ စာမရတာမို့၊ မြန်မာများဘုန်းသမ္ဘာ၊ ရှုံးပါပေါ့ကံတစ်မျိုး။

မန်းအပျက်မှာ၊ စန်းလဂ်မသာမယာမို့၊ မြန်မာ-မြန်မာချင်းတောင်မှ၊ အတင်းရန်မူလို့၊ ရန်သူကို ရန်သူဟူ၍ မမှတ်တဲ့ပြင်၊ ကိုယ့်တပ်ကိုယ် ပြန်နင်းကြတဲ့၊ ဖျင်းလှတဲ့ ကမြင်းမအကောင် ဗိုလ်တချို့ရယ်က၊ ကိုယ်ဖို့အလွတ်ရုန်းရော့မယ်လို့၊ တောင်ကုန်းသာသာယာယာ မြင်းမဏိစခန်းဆီက၊ တရှောင်ရှောင်ပုန်းကာ အတွင်းသိတဲ့၊ မင်းအမိဖမ်းချင်ကြတဲ့ပြင်၊ ပရမ်းပတာ တော်ရာလျော်ရာပြေးကြတော့၊ အရေးရှင်မကြံသာသနဲ့၊ ကံကြမ္မာရွေးဝန်ကြွေးပေးထင့်၊ လေးတိုင်စင်ရွာ အတွင်းတွင်ဖြင့်၊ အင်္ဂလိပ်တွေ အတင်းကြိတ်မဟေ့လို့ စမ်းခဲ့တဲ့၊ စာဖောင်ဖောင်သတင်း၊ တပြောင်ပြောင်လင်းခဲ့တဲ့၊ တောင်တွင်းသခင်ကို၊ အောင်တြင်းမရခင် ဖမ်းတဲ့ပြင်၊ အကြမ်းပတမ်း မလုပ်ကောင်းသော်လည်း၊ ဦးခေါင်းဖြတ်ကာ အသေသတ်ကြသတဲ့၊ မကျေနပ်ရှာသူ ကျောင်းတပဲ့ဗန်းတို့ရဲ့၊ မြေရပ်မှာ တဘောင်နဲ့လွမ်းကြပေတော့၊ တောင်တမန်းမြို့ နေလနှစ်ဆောင် အညိုးတွင်ဖြင့်၊ ပြေမြန်မာ့တဘောင် မစိုးရရှာတဲ့၊ အခေါင်မမြန်း၊ အမှောင်သန်းသမို့၊ အောင်ပန်းညို့ခဲ့ရတဲ့၊ အောင်ဆန်းတို့ ရွှေလရောင်အဘိုး။......။

ယူနီဘာစတီဘွဲ့ လေးချိုး

(၁) “ဘွိုင်းကောက်”အဖြစ်မျာ၊ မေတ္တာ အထယ် မသေးသော် လဲ့၊ “မှိုင်း”တစ်ယောက် မစ္စတာ – ချစ်ရာ မမယ် သေးနိုင်ဘု၊ သစ္စာ တကယ် သွေးတွေ ဟဲ့လို့။ တွေးနဲ့ နောင်ဘို့ အလို။ အိုကွယ့် ခေတ္တရာနယ် တကြေး ဆီက၊ မေးရဲ့ မောင်တို့ကို။

(၂) သြော် ဝေးခရီးက ပေမဲ့၊ အရေးကြီး လျှင်ဖြင့်၊ သွေးနီရာ ပါစမြဲ ပေမို့၊ ဆရာလဲကွာ၊ ပထမ အရင်- ကနဦး ဆီက၊ မြန်မာ တစ်ခွင်မှာ- သမတရှင် ဘုရင် မလူးခင်ပ။“ထ”ဆင်ထူး ကို၊ တမြည်မြည် သင်ခဲ့သမို့၊ “ထီ”မထင် ကျောင်းတော်သား တွေရဲ့၊ အမည် အစဉ်မှာ-ခေါင်း အပေါ်ဖျား တွင်မှ မင်းရို့ ဆရာကို စာရင်းတို့ကာ ထားလိုက်ကြ ပေတော့၊ သြော် ဘုရား သိကြားတွေ မ – လို့မို့၊ အများ ဝေနေယျ တို့ဘို့ အရှေ သမယ “ပဝေ” သရေ ခေတ်ဆီက၊ ရွှေ-ငွေ ဖြစ်သူ “ဆရာအောင်”ရဲ့ ပြင်၊ မြန်မာဘောင် ပေါက္ကံတိုင်း တွင်မှ၊ သမိုင်း တစ်စောင် သစ်ခဲ့တဲ့၊ အဇ္ဇဂေါနာ၊ ဆရာ ရှင်မထီး တို့ လိုပ၊ ဖြစ်ကြ သောအခါ၊ တာ အ၀င်မှာ ပြီးစေဖို့၊ ခရီးသယ် ရောက်ရာ ကြိုခဲ့တယ်၊ အမျိုးအတွက် သဒ္ဓါတရ ကိုယ်ပါနော်ကွယ်၊ မျိုးမျိုး မျက်မျက်၊ အကျိုးနက် စေဖို့၊ ထိုးရက်ပါကို။

(၃) အနှစ် တစ်ထောင် ရှေစွာ၊ နေစရာ မျိုးရယ်လို့၊ မဖြစ်ဖြစ်အောင် သေသေချာချာ ထိုး ရပါတော့၊ ရွှေ ငွေ အသပြာ မိုးတွေ နဲ့၊ သွန်းဖြိုး ဗြဟ္မစိုရ်။ အစွမ်းတန်ခိုး ထိုထိုရယ်နှင့် – ကရုဏာ မေတ္တာပွား၊ အိုကွယ် လွမ်းမိုး တညိုညိုရယ်နှင့် သမုဒယ သစ္စာတရား။

(၄) “မှိုင်း” ဟဲ့နော်၊ တိုင်းနယ့် ပြေပေါ် မဖြင့်၊ ကသိုဏ်းနဲ့ ဖြေဖျော်တဲ့၊ တဇေယော် အထိကရ တပါးပေပေါ့၊ ကဝေ အကျော်အမော် မှာ တပည့်မ တွေကလည်း များချိန်မို့၊ အစိအငှ သွားကာ၊ ဆန်ကို ခံကြတော့၊ ယမန် ဟိုပုဂံ၊ သရေခေတ္တရာ တို့လို၊ ရွှေတွေ ငွေတွေ ဖြစ်လျှင်ဖြင့်၊ အရှေ ချစ်မကွယ်၊ သဒ္ဓါပေါက် သူက၊ ပြည်ခေတ် အနယ်နယ်၊ နာဂရ တလျှောက်မှာလ အမယ်မင်း၊ နောက်တသိုက်- ဇမ္ဗူဒီ မြန်မာသားတွေ မဖြင့် သြော် အမြှောက် ကြိုက် ကြိုက်ပြီး အချောက် တိုက် နဲ့ လူမညီ၊ ပါလျှင်ဖြင့် “မှားကြလိမ့် မထင့် အို – ဘေဒါရီရဲ့၊ မြှောက်လိုက်မကွဲ့… မောက်လိုက် မဟဲ့လို့… ဆောက်လိုက်မဲ့ ယူနီဘာစီတီတွေ အများ။ ။

နှင်းဆီပွင့်

လယ်တောကပြန်
ပန်ချင်တယ်  ခရေဖူးဆိုလို့
မောင်ခူးကာပေး ။
မနက်တုန်းဆီက
ကျော့ဆုံးကို  မောင်မြင်တော့
သူ့ဆံပင်   နှင်းဆီပွင့်တွေနဲ့
ဂုဏ်တင့်တယ်လေး ။။။။။

သပြေညို

သူ့ခေါင်းမှာတဲ့ သပြေညို၊
ငါ့ခေါင်းမှာတဲ့ သပြေညို။
တို့ပြေမှာ တို့မေကမ်းပါတဲ့
သပြေညို ရွှေဘိုပန်းဟာက
လန်းလျက်ပါကို။

ဘာမလျှော့လေနဲ့
လာတော့မကွဲ့ ရွှေပဟိုရ်
လေချိုကအသွေး။
လင်းကြက်အဆော်
ကွင်းထက်မှာတူပျော်ပျော်နဲ့
စည်တော်ကို ရည်မျှော်မှန်းကာပ
ရောင်နီမှာ အောင်စည်ရွမ်းရအောင်
သပြေညို ရွှေဘိုပန်းရယ်နဲ့
လှမ်းကြစို့လေး။ ။

ဇန္နဝါရီ ၄ ၁၉၃၈
မင်းသုဝဏ် -၁၉ဝ၉-၂ဝဝ၄

ကျောက်ဆောက် ဘုရားတိုင်ရတု -မယ်ဘွဲ့ ( ၁ )

တသောင်းရှစ်မည်၊ လေးထောင်တည်ကို၊
ရစ်သည်လှည့်ပတ်၊ လပြာသာဒ်နှင့်၊
ရန်နတ်နီးခိုက်၊ သောစဉ်ကြိုက်ဝယ်၊ ‎
ထိန့်ရိုက်သပြေ၊ အာဏာမွှေသား၊
သရေဓမ္မ၊ သောကရွှေမှောက်၊
တည်ခဲ့မြောက်သည်၊
ကျောက်ဆောက်လျှံပြောင်၊ ‎မိတည်းနောင်။ ။
ရည်စောင် လနှစ်၊ အသစ်အသင့်၊
ကြားဆင့်လေသံ့၊ မပျံ့စဘူး၊
အမူးအမော်၊ ကြိုးသည်သော်ကား။
‎နားတော်ပျံ့ညောင်း၊ ညွတ်ချင်ကောင်းဟု
ရွေပေါင်းလှည့်ဖြား၊ လျှောက်ပါငြားလည်း
ရွှေသားမြလျှံ၊ ‎မွတ်ညက်စံသည်။ ။
ချစ်သံမြွက် မခြည်သောကြောင့်။

မုဋ္ဌော ဘုရားတိုင်ရတု – မယ်ဘွဲ့ ( ၃ )

ခပေါင်းမြစ်ဝှန်၊ သည်ကိုလွန်၍၊
ရန်မာန်အောင်မြေ၊ လှည့်ခဲ့ခွေသား၊
မင်းနေညီနောင်၊ မြို့ထွတ်ခေါင်ဝယ်၊
‎ခြောက်ရောင်ဘဝဂ်၊ နှင့်သာစက်မျှ၊
ကွန်ရက်ခြည်စုံ၊ ပွင့်ငုံလျှံတောက်၊
သုံးပါးနောက်ကို၊ မရောက်ဘူးပါ၊
ခုသာလျှောက်ပန်၊ ‎မလွန်ခေါက်ရက်
ကြားတိုင်းထက်လည်၊ ရွှေစက်တင်ဦး၊
ရသော်ထူး၏၊
ညွှတ်နူးစိမ့်သား၊ သည်စကားမူ၊
ပျံ့ရှားမဉ္ဇူ၊ ‎နှင့်သာတူရှင့်၊
မဖြူစိတ်ညို၊ ရှိမည်ကိုလည်း၊
မြွက်ဆိုသမ်းမဲ၊ မတုံ့ဘဲသည်
ချေလဲမသာ ခက်သောကြောင့်။

မုဋ္ဌော ဘုရားတိုင်ရတု – မယ်ဘွဲ့ (၂ )

မပြောင်းရစ်ဟန်၊ ဗျာပါချန်ခဲ့၊
ပြန်ပြန်ကြိုးခက် တုံ့မမြွက်၍၊
ဘုန်းစက်ဗျာဒိတ်၊ ချစ်နိမိတ်ကို၊
မယ့်စိတ်ယုံထိုက်၊ ‎သို့စင်ကြိုက်ဝယ်၊
သုံးတိုက်ပယ်မှောင်၊ ထွတ်ဘုန်းခေါင်လျှင်၊
ငြိမ်းအောင်ပြေကြောင်း၊ ဖြည့်ပါကောင်း၏၊
တသောင်းဇမ္ဗူ၊ ‎လှည့်ယူကြိုက်ရာ၊
ရွေးခဲ့ရှာလည်း
စကြာရဟတ်၊ ပန်းကာပတ်လိမ့်
ညွတ်ညွတ်ခခ၊ ယုယပျော်ပါး
သနားလေလေ၊ ‎ထွေထွေမသိ
မျက်စိတန်ဆောင်၊ ထွန်းပြောင်လျှံဝါ၊
သခင်သာဟု၊ မေတ္တာမတန့်၊
သက်လုံးခန့်သည်။ ။
ကြင်ညွန့် မဖြာ ‎ရက်သောကြောင့်။

မုဋ္ဌော ဘုရားတိုင်ရတု – မယ်ဘွဲ့ (၁)

တသောင်းရှစ်ပြန်၊ လေးထောင်လွန်သား၊
ယုဂန်လှည့်သွား၊ လရထားနှင့်၊
‎နတ်သားနီးကြ၊ သောကာလတွင်၊ ‎
သောကဓမ္မာ၊ ဌာပနာသား၊
သစ္စာဉာဏ်ပေါင်း၊ မရှုတောင်းသည်၊
ညီနှောင်းနောင်စော ‎မြတ်မုဋ္ဌော။ ။
ကြာမောနေ့ရက်၊ ‎သက်ဆက်သည်ချည်း၊
မနည်းကုံးသီ၊ များလေပြီတည့်၊
နွှဲမှီတူစုံ၊ ဘုန်းချင်းဆုံကို၊
ကြေးမုံအသွင်၊ ရှုမြင်နေကျ
ပါချင်လှ၍၊ ‎ထိန်းယရွေဘော်၊
လျှောက်ပါသော်လည်း၊ နားတော်မညွှတ်၊
ဆင်းကြာနတ်သည်။ ။
နှုတ်လွှတ်မပါ မြွက်သောကြောင့်။

ရက်စက်လွန်းသော ဂလဲ့စား

သေမင်းရဲ့ ဖိတ်စာ
လာပါခဲ့ မနှေး ။

ငါမလာ ပြန်စာရေးတယ်
အိပ်နှင့်တော့လေး ။ ။

ချစ်သူ့ရဲ့ချိန်းစာ
လကာနဲ့ အတွေး ။


မောင်လာရင် ရွှေရင်နွေးနဲ့
ခင်ထွေးမယ်လေး ။ ။

မိုးသောက်သောအခါ
မျက်နှာမှ မသစ် ။

ချစ်သူ့အိမ် အရောက်သွားတယ်
လှေခါး ဆယ်ထစ် ။ ။

ဧည့်ခန်းသို့ဝင်
ရွှေရင်တို့လှုပ်ရှား ။

အလောင်းစင်
ပြင်ကာထားတယ်
သေမင်းဂလဲ့စား ။ ။

သစ္စာသည်သာ အလှတရား

ငါသေတဲ့အခါ
ဘာအမွေများ ထားခဲ့ရပ
အို … လောက တဝှမ်းလုံး
အချောအလှအဆန်းဆုံး
သဘောဓမ္မလွှမ်းဖုံး
မနောမယပန်းကုံးတွေကို
တေးဖွဲ့ကာ ကဗျာတွေသီလို့
အသည်းလွှာမြေမဟီဝယ်
အုတ်ဂူလုပ်ကာ မြုပ်ခဲ့မည်ပ။

ဒေါင်းနွယ်ဆွေ

မာန်

အပွင့်ကိုခူး
အဖူး ငါ့မှာ ကျန်သေးတယ် …

အဖူးကို ဖျက်
အခက် ငါ့မှာ ကျန်သေးတယ် …

အခက်ကို ချိုး
အရိုး ငါ့မှာ ကျန်သေးတယ် …

အရိုးကို နှုတ်
အငုတ် ငါ့မှာ ကျန်သေးတယ် …

အငုတ်ကိုပယ်ရွေ့
မျိုးစေ့ ငါ့မှာ ကျန်သေးတယ် …

မနက်ဖြန်ဆို ငါပင်ပျိုသည်
ဝေစည်စိမ်းလျှက် သီးပွင့်ရွက်နှင့်
ခက်လက်ဝေဆာ မြေကမ္ဘာမှာ
သာယာဝင့်လန်း မေတ္တာဖျန်းပြီး
ငါ့လမ်း ငါလျှောက်နေဦးမယ် … ။

ဒေါင်းနွယ်ဆွေ

စမ်းရေအမောဝယ် ပန်းအကြွေစောတယ်

ပန်းအလှကို
စမ်းကထောမနာ
ရစ်ဖြာဝိုက်ဝန်း စီးဆင်းသည်။

စမ်း၏အေးမြ
ထိုရသကို၊ ပန်းကချီးကျူး
ငုံဖူးဝတ်လွှာ ချွေလွှင့်သည်။

စမ်းချောင်းတိမ်ကော၊ မြက်ရိုင်းတောမှာ
ကျစ်စာဖုံးလွှမ်း၊ အိုလွမ်းစရာ
ပန်းခမျာလျှင်၊ နွမ်းကာခြောက်သွေ့
ရေမတွေ့ရ၊ ပူငွေ့လောင်မြိုက်
ရှိုက်ငင်တမ်းတ၊ စမ်းဘဝကို
ပန်းကငိုကြွေး မဆုံးနိုင်။

တစ်နေ့သောအခါ၊ ပြည့်လာစမ်းချောင်း
ပြန်ပြောင်းရေစီး၊ သူ့နီးဝန်းကျင်
ပန်းပင်ခမျာ၊ မရှိရှာတော့
မြေလွှာဗျိုက်တော၊ ကြွက်သောသောဖြင့်
ရွေ့လျောပန်းပင်၊ မြက်ခင်းပြင်ဝယ်
မမြင်လေရ၊ ထိုခဏတွင်
စမ်းက ရှိုက်ငိုပြန်လေသည်။

နှစ်ပေါင်းများစွာ၊ ကြာသောခါတွင်
မြေလွှာတထီးကျန်၊ သဏ္ဌာန်ရွှေ့ပြောင်း
စမ်းချောင်းသစ်ပင်၊ မမြင်လေရ
ဘာမျှမမြဲ၊ မလွဲဧကန်
လောကဓံကို
လွန်ဆန်ငြင်းပယ် မရပါတကား။

စမ်းငိုသလို၊ ပန်းလည်းငိုခဲ့
သို့ပေမယ့်ကွယ်၊ ဆက်သွယ်မှုကင်း
ငိုချင်းနှစ်ပုဒ်၊ လွမ်းဇာတ်ထုပ်ကို
ကျွန်ုပ်စာဆို၊ ထပ်ဆင့်ငိုမိ
ဘယ်လိုမျက်ရည် တန့်ဆည်ရမလဲကွယ်။

ဒေါင်းနွယ်ဆွေ

ဗေဒါလမ်း(၂ ) မယ့်လမ်းပါတဲ့

ဒီချောင်းမှာရွှင်၊ ဗေဒါခင်ပြာလဲ့
စံပယ်ကို ယမယ်ဖွဲ့ (ယိုးမယ်ဖွဲ့) ကမ်းကပ်ချင်ခဲ့။
ဒီချောင်းမှာရွှင်၊ ဗေဒါခင်ပြာလဲ့
ပျိုမယ်ကို ယမယ်ဖွဲ့၊ ကမ်းကပ်ချင်ခဲ့။
ဒီချောင်းမှာရွှင်၊ ဗေဒါခင်ပြာလဲ့
စေတီငယ်ယမယ်ဖွဲ့၊ ကမ်းကပ်ချင်ခဲ့။
လင်းယဉ်နွဲ့ တချီချီ
ကျူရိုးရှင်သူ့စကား၊ နားကျခဲ့ပြီ
ကျွတ်ဆုမြတ် စလွယ်ချည်၊ ဗေဒါရီပြာလဲ့။
စုန်ချည် ဆန်ချည်နဲ့
ဒီချောင်းရေ ဗေဒါလမ်း၊ မယ့်လမ်းပါတဲ့။ ။

ဇော်ဂျီ
(ရန်ကုန်တက္ကသိုလ် နှစ်လည်စာစောင်၊ ၁၉၅၇ – ၁၉၅၉)

ဗေဒါလမ်း(၁) မယ့်လမ်းပါလား

ပန်းနီလာ၊ ဗေဒါဆင်သ လို့
ယဉ်လှတယ်လေး။
စုန်ချည် ဆန်ချည်နဲ့
ဒီချောင်းရေ ဗေဒါလမ်းမှာ၊ တန်းစီလို့လေး ။

အိုအချင်းကျူရိုးရှင်။
မဗေဒါပြာလဲ့လမ်း၊ ကမ်းကပ်မယ်ပြင်။
စံပယ်လှပွင့်ဖြူစင်၊ ကမ်းခွင်ကငယ်ကျွမ်း။
သူ့လိပ်ပြာခြံအရံနဲ့၊ သူစံရာ သူပျော်မွေ့။
ပြေးတွေ့ချင်စမ်း….. တဲ့။

တွေ့ချင်တဲ့စေတနာရယ်။
ငယ်ကျွမ်းဆွေ လွမ်းဝေတေးပေမို့
အေးချိုလှတယ်။
လိပ်ပြာကဝတ်ရည်သယ်၊ စံပယ်ကမအား။
ပွင့်ဖူးတဝေဝေနဲ့
ဒီချောင်းရေ ဗေဒါလမ်း
မယ့်လမ်းပါလား။

အိုအချင်း .. ကျူရိုးရှင်။
မဗေဒါပြာလဲ့လန်း၊ ကမ်းကပ်ပြန်ချင် ။
ဟိုအကွေ့မှာလ
ကိုရင်ဖေ့ ချစ်ရေစင် ၊ ပျိုခင်ရဲ့အနွဲ့။
ပျို့လက်မှာ မယ်ဗေဒါက
ပျို့မျက်နှာ ချစ်အုံ့ပုန်းကို ၊ ပြုံးကြည့်ချင်ငဲ့.. တဲ့။

ကြည့်ချင်တဲ့စေတနာရယ်
သနားဘွယ် ချစ်ဘွယ်တေးပေမို့
အေးချိုလှတယ်။
ချစ်စနိုးရယ်နဲ့၊ မြစ်ရိုးကအပြာချယ်ကို။
ပျို့နယ်လိုက်လေမလား။
ပွင့်ဖူးတဝေဝေနဲ့
ဒီချောင်းရေ ဗေဒါလမ်း၊ မယ့်လမ်းပါလား။

အိုအချင်းကျူရိုးရှင်။
မဗေဒါပြာလဲ့လန်း၊ ကမ်းကပ်ပြန်ချင်။
ထီးတော်ကတချွင်ချွင်
ကွင်းပြင်ကဘုရား။
နေမင်းညိုချိန်တန်ပေါ့
နိဗ္ဗာန်ကိုစိတ်ကြံကူး၊ ဖူးချင်လျက်သား …. တဲ့။

ဖူးချင်တဲ့စေတနာရယ်။
နိဗ္ဗိန္နာ ဂီတာတေးပေမို့၊ အေးချိုလှတယ်။
ကျွတ်ဆုကိုရွယ်၊ လွယ်ပါတော့အရ
ပွင့်ဖူးတဝေဝေနဲ့
ဒီချောင်းရေ ဗေဒါလမ်း၊ မယ့်လမ်းသာပါ့။

ချောင်းရေကဖောင်၊ တောင်လေကသွေး။
ရွက်လင်းယဉ် မြိုင်မြိုင်နဲ့
ပန်းတိုင်ကို ပန်းခိုင်ဆိုက်အောင် ၊ အားစိုက်ပါလေး။ ။

ဇော်ဂျီ

(ရန်ကုန်တက္ကသိုလ် နှစ်လည်စာစောင်၊ ၁၉၅၇ – ၁၉၅၉)

အပ်နဖား

ထိုးသော်လဲ့ ထိုးသော်
ကြိုးချော်လို့သွား
အမယ်အို အမြင်ကပ်တယ်
အပ်ရွှေနဖား။

ဇော်ဂျီ

မဟော်သဓာဇရပ်

ညီသစ်ဆင်း
မင်း၏သားငယ်၊ သက်နှစ်ဆယ်
သူ့နယ် ဝန်းကျင်၊ သူ့မျက်မြင်မှ
ဆင်ခြင်တွေးခေါ်၊ အတွေးပေါ်
မဟော် ဉာဏ်ဖြစ်၊ ဇရပ်သစ်ကို
နှစ်သက် မြတ်လေး၊ ခေတ်ရှေ့ပြေးဟု
အရေးဆိုလာ၊ မင့်သည်းချာကို
သာဓု သာဓု ငါ ခေါ်၏ ။

အဘယ်ကြောင့်ဆို၊ ဟိုးရှေးကပင်
လူ့ခွင် ကျိုးပြု ၊ လိုအပ်မှု၌
ကရုဏာ ထား ၊ သဒ္ဒါပွားလျက်
ဆောက်ခဲ့ ဇရပ်၊ မဟော်ဇာတ်၌
ငါ ဖတ်ဖူးသည် ဖြစ်သောကြောင့်။

ကိုယ်ထူကိုယ်ထ၊ ရွာ ကိစ္စ၌
တက်ကြွ ရွာသား၊ စိတ်ဝင်စားအောင်
ရှင့်သား မဟော်၊ ဖွားဖက်တော်တို့
ရဲဘော် စိတ်ပေါက်၊ စုပေါင်းဆောက်ခဲ့
တစ်ယောက်တစ်ကျပ်၊ ထိုဇရပ်သည်
ဇာတ်မဟော်တွင် ကျော်သောကြောင့်။

ဇရပ် သာယာ၊ ခန်းဖွဲ့ရာတွင်
ရွာပ ရွာတွင်း၊ ရွာသားချင်းဝယ်
မှုခင်းကိစ ၊ ချင်းများကြသော်
ဆုံးမစကား ၊ တရားသဘင်
အများ မြင်အောင်၊ စီရင်စရာ
လျာထားသတ်မှတ်၊ ထိုဇရပ်သည်
ဇာတ်မဟော်တွင် ကျော်သောကြောင့်။

သွားလာ ဥဒဟို၊ ဧည့်ထိုထိုမှ
ကိုယ်ဝန် ထိန်းကျောင်း၊ မိခင်လောင်းတို့
လဲလျောင်းသက်သာ၊ သားဖွားရာ ဟု
လျာထားသတ်မှတ်၊ ထိုဇရပ်သည်
ဇာတ်မဟော်တွင် ကျော်သောကြောင့်

ဇော်ဂျီ
ရတနာမွန်၊ ဒီဇင်ဘာလ ၊ ၁၉၈၁

ပြောလိုက်ပါဘိ ဟောပါဘိ

ငါ့ညီပြောင်ဝင်း၊ မောင်သစ်ဆင်း၊
မင်း၏သက်လှယ်၊ မင်း သားငယ်သည်၊
သက်နှစ်ဆယ်ပင်ပြည့်ခဲ့ပြီ။

သူသုံးနှစ်သား၊ ဖေါ်ချင်းများနှင့်၊
အူယားဖါးယား၊
ကစားရာမှ၊ နွားရုပ်ချ၍၊
နတ်ကျသည့်သွင်၊ မင့်ရင်ခွင်သို့၊
ပြေးဝင်ပုန်းလာ၊ သူ့မူရာကို၊
ငါမြင်ခဲ့၏ မှတ်မိ၏။

မိုးကစိုစို၊ ကျီးအုပ်ပြို၍၊
ထိုမှဤမှ၊ တို့လမ်းမတွင်၊
ပျံကြဝဲကြ၊ ငရဲကသို့၊
အြွုံကမြည်အာ၊ မသာယာကို၊
ငါကြားခဲ့၏ မှတ်မိ၏။

ထိုနေ့၌ပင်၊ ထိုချိန်ထင်၏၊
သခင်အောင်ဆန်း၊ ပြည်သူ့ပန်းသည်၊
ပွင့်လန်းခါစ၊ြွေကလိုက်ရ၏၊
မြေခသတင်း၊ မိုးကြိုးခွင်းသို့၊
အိမ်တွင်းအိမ်ပြင်၊ တို့လမ်းခွင်၌၊
မချင်မရဲ၊ ဝမ်းနဲခံခက်၊
မျက်စိမျက်နှာ၊ ညှိုးကြရှာသည်၊
ရွာဦးပိုင်းမှ သင်္ချိုင်းထိ။

ငါ့ညီပြောင်ဝင်း၊ မောင်သစ်ဆင်း၊
မင်း၏သားငယ်၊ နှစ်ဆယ်သက်စစ်၊
သူတို့ခေတ်၌၊ တိုင်းချစ်ပြည်ခင်၊
မြတ်စေချင်၏၊ မင်းမြင်ငါကြား၊
စကားဥဒါန်း၊ ဆန်း၏သတ္တိ၊
ဆန်း၏သမာဓိ၊ ဆန်း၏ပညာ၊
ဆန်းမှာဆုံပေါင်း၊ ယောကျာ်းကောင်းတို့၊
ခေါင်းဆောင်သဘော၊ မင့်သားချောကို၊
ပြောလိုက်ပါဘိ ဟောပါဘိ။ ။

ဇော်ဂျီ

(ဇူလိုင်လ ၁၉ ရက်၊ ၁၉၆၄ ခုနှစ်၊ အာဇာနည်နေ့)

သခင်အောင်ဆန်းတရား

ငါ့ညီပြောင်ဝင်း၊ မောင်သစ်ဆင်း၊
မင်း၏သားငယ်၊ မင်းသက်လှယ်ကို၊
အဘယ်တရားဟောမည်နည်း။

ဆန်း၏ သတ္တိ၊
ဆန်း၏ သမာဓိ၊ ဆန်း၏ ပညာ၊
ဟောစရာကား အလွန်များ၏။

မင့်သားအရွယ်၊ သက်နှစ်ဆယ်တွင်၊
လူငယ်အောင်ဆန်း၊ သူ့အစွမ်းကို၊
ပန်းကောင်းတပွင့်၊ ပန်ဆင်တင့်သို့၊
မင့်သား သိစေချင်လှ၏။

သူ့အစွမ်းကား၊ အခြားမဟုတ်၊
အအုပ်ချုပ်ခံ၊ မျိုးခြားဒဏ်မှ၊
မြန်မာလွတ်လမ်း၊ ခရီးကြမ်းဝယ်၊
ဗန်းပြအလှ၊ ပကာသနကို၊
ပြာကျလောင်မြိုက်၊ သူမီးတိုက်၏၊
ခေတ်လိုက်စာညီ၊ ခေတ်မီပညာ၊
ကြုံရာဘဝ၊ မုကလုံလောက်၊
ခံမြို့ဆောက်၏။

ထို့နောက်တဆင့်၊ မိုးထိလွင့်အောင်
ရိုးကျင့်မြင့်ကြံ၊ သူ့အလံတည့်
ပျံတလူလူ၊ သူထူခဲ့ကြောင်း
ခေါင်းဆောင်သဘော၊ မင့်သားချောကို၊
ပြောလိုက်ပါဘိ၊ ဟောပါဘိ။ ။

ဇော်ဂျီ

အိမ်အလှ

ငါ့ညီပြောင်ဝင်း၊ မောင်သစ်ဆင်း
မင်း၏သားငယ်၊ သက်နှစ်ဆယ်သည်
ဘယ်အိမ်မျိုးကို ကြိုက်သနည်း။

အိမ်ရှေ့ပန်းခင်း၊ ဇာပြတင်းနှင့်
အိမ်တွင်းကော်ဇော၊ ဆိုဖာချောနှင့်
အံ့ဩ ရင်မ၊ ဗန်းပြ လှလည်း
စိတ်က မောဟ၊ လက်က လောဘ
နှုတ်က မာန၊ ထားတတ်ကြမူ
အတ္တကိုယ်ကျိုး ထိုအိမ်မျိုး။

အိမ်နောက်စိုက်ခင်း ၊ စာမျိုးဟင်းနှင့်
အိမ်တွင်းသန့်စင်၊ လေ နေ ဝင်နှင့်
အားအင်မျှတ၊ ဗန်းမလှလည်း
စိတ်ကမေတ္တာ၊ လက်မှာ စာဂ
နှုတ်က ဖြေင့်ရိုး၊ အနေရိုးမူ
သူ့ကျိုး ကိုယ့်ကျိုး ထိုအိမ်မျိုး ။ ။

ဇော်ဂျီ
ညီသစ်ဆင်းကဗျာစု
၁၉၆၅

ဂုဏ်အလှ

ငါ့ညီပြောင်ဝင်း မောင်သစ်ဆင်း
မင်း၏သားငယ် သက်နှစ်ဆယ်သည်
ဘယ်ဂုဏ်မျိုးကို ကြိုက်သနည်း ။

ရွှေဂုဏ်ငွေဂုဏ် ရာထူးဂုဏ်သည်
လူ့ဘုံလောက အကာမျှတည့်
သူကငြူစူ မကြည်ဖြူ၍
ခွာယူလိုက ခွာ၍ရ ။

ရိုးဂုဏ်ဖြောင့်ဂုဏ် ယဉ်ကျေးဂုဏ်သည်
လူ့ဘုံလောက နှစ်သာရတည့်
သူကငြူစူ မကြည်ဖြူလည်း
ခွာယူမရ ကွာမကျ ။

ဇော်ဂျီ

သင်သေသွားသော်

ဪ…လူ့ပြည်လောက၊ လူ့ဘဝကား
အိုရနာရ ၊ သေရဦးမည်
မှန်ပေသည်တည့်။
သို့တပြီးကား၊ သင်သေသွားသော်
သင်ဖွားသောမြေ၊ သင်တို့မြေသည်
အခြေတိုးမြင့်၊ ကျန်ကောင်းသင့်၏။
သင်၏အမျိုးသား၊ စာစကားလည်း
ကြီးပွားတိုးမြင့်၊ ကျန်ကောင်းသင့်၏။
သင်ဦးချ၍ အမျှဝေရာ
စေတီသာနှင့်၊ သစ္စာအရောင်
ဥာဏ်တန်ဆောင်လည်း
ပြောင်လျက်ဝင်းလျက် ကျန်စေသတည်း။

ဇော်ဂျီ

တို့တိုင်းပြည်

ထလော့မြန်မာ၊ အိုမြန်မာတို့
တို့ရွာ၊ တို့မြေ၊ တို့ရွာမြေ၀ယ်
စေတီ၊ စပါးများလည်းများ၏
များပါလေလဲ၊ တမွဲမွဲနှင့်
ဆင်းရဲကာသာ၊ ကာလကြာလျှင်
ယာစကာမျိုး၊ တညှို့းညှိုးနှင့်
ပုထိုး မြင့်မောင်း၊ ကျောင်းကြိုကျောင်းကြား
လှည့်လည်သွားလျက်
မစားလေရ၊ ၀မ်းမ၀၍
ဆွမ်းမျှ မတင်နိုင်ရှိမည်တည်း။
ထလော့မြန်မာ၊ အိုမြန်မာတို့
တို့ရွာတို့မြေ၊ တို့မြေရွာဝယ်
ရေချိုသောက်ရန်၊ မြစ်ချောင်းကန်နှင့်
သီးနှံချိုပျား၊ များလည်းများ၏
များပါလေလဲ၊ တမွဲမွဲနှင့်
ဆင်းရဲကာသာ၊ ကာလကြာလျှင်
မြင်သာမြင်ရ၊ မစားရ၍
တောကပြိတ္တာ ဖြစ်မည်တည်း။
ထလော့မြန်မာ၊ မြန်မာထလော့
အားမပျော့နှင့်၊ မလျှော့လုံ့လ
သူကစ၍၊ ငါကအားလုံး
လက်ရုံးမြားမြောင်၊ ဥာဏ်မြားမြောင်နှင့်
စွမ်းဆောင်ကြလေ၊ ဆောင်ကြလေလော့
ဤမြေဤရွာ၊ ဘယ်သူ့ရွာလဲ
ဤယာစပါး၊ ဘယ်သူ့စပါးလဲ
ထားလော့တာဝန်၊ ပွန်လော့လုပ်ငန်း
ဥာဏ်ရှေ့ပန်း၍
တ၀မ်းတစိတ် ညီစေသတည်း ။